நிலைப்பாடு 15

என்ன சார் .. திருக்குறளையும் சிறப்பாகச் சொல்றீங்க. அப்புறம் வர்ணதர்மம், சநாதனம் இதில் குழப்பம் என்று சொல்றீங்க.. 

திருக்குறளில் குழப்பம் என்று சொல்லவில்லை. அதுதான் வாழ்க்கைக்கு வேண்டிய அறவழி என்பதற்குத் தெளிவைத் தருகிறது. குழப்பம் எதிலென்றால், ஒரு சமயம் வர்ணதர்மம் என்று சொல்றீங்க, அப்பறமா சநாதனம் என்று சொல்றீங்க. அப்ப வர்ணதர்மம்தான் சநாதனமா என்று கேட்டால் இல்லை இல்லை வர்ணதர்மம் வெறுமனே மனிதர்கள் கூடி ஏற்பாடு செய்துகொண்ட, அது என்ன பௌருஷேயி வ்யவஸ்தை என்று ஹரதத்தர் வியாக்கியானம், ஆபஸ்தம்ப தர்ம சாத்திரம், அதில் இருக்கிறது என்று பார்த்தால், அப்படீன்னா, வர்ணதர்மம் காலத்திற்குக் காலம் மாறக் கூடியதுதானே, மாறாத நற்குணங்கள், சமுதாய நலன்கள், இவைமட்டும்தான் சநாதனமா என்று கேட்டால், இல்லை இல்லை அப்படியில்லை, ஸ்ரீகிருஷ்ணரே சொல்லியிருக்கிறார், தாமே நான்கு வர்ணங்களையும் படைத்ததாக என்றும் சொல்கிறீர்கள். அவரே படைத்தார் என்றால் எப்படி ஆபஸ்தம்பரும், அவருக்கு உரையெழுதிய ஹரதத்தரும் வர்ணதர்மம் என்பது பௌருஷேயி வ்யவஸ்தை (மனிதர்களால் கூடி ஏற்படுத்தப்படும் ஏற்பாடு) என்று சொல்வார்? கேட்டால் என்ன சொல்கிறீர்கள் ... ஆஹா... கீதைக்கு உரையெழுதிய ஆசார்யர்கள் எல்லாம் என்ன சொல்கிறார்கள் பார்! அதற்கு விரோதமாகச் சொல்ல நாம் யார் என்று சொல்கிறீர்கள். சரியப்பா.. ஆசார்யர்கள் சொல்கிறபடிப் பார்த்தால் வர்ணதர்மம் என்பதும் சநாதனம்தானா? அதுவும் சநாதனம் என்றால் 13ஆம் நூற் ஸ்ரீஅழகியமணவாளப்பெருமாள் நாயனார் தமது ஸ்ரீஆசார்ய ஹ்ருதயம் என்னும் நூலில் எழுதுகின்ற கருத்துக்கு என்ன பதில் சொல்வீர்கள்? 

என்ன எழுதறார்? 

பிரபத்தி என்னும் மார்க்கத்தை ஏற்றுக்கொண்ட பிரபன்னர்கள், பாகவதர்கள் என்போர் விஷயத்தில் வர்ணதர்மம் பொருந்தாது, விசேஷ தர்மம் ஆகிய பிரபன்ன தர்மமே பொருந்தும். அதற்கு அவர் ஸ்ரீவில்லிபுத்தூர் பகவர் வார்த்தை என்று ஒரு சுலோகத்தை மேற்கோள் காட்டுகிறார். ஸ்ரீவில்லிபுத்தூர் பகவர் என்பவர் குளத்தில் குளிக்கச் செல்லும் போது அவரைப் பிராம்மணர்கள் தமது துறையில் வந்து குளிக்குமாறு கூப்பிட்டார்களாம். அவர் அதற்குப் பதிலாகச் சொன்னாராம். ‘நீங்கள் பிராம்மணர்கள்; நாங்களோ விஷ்ணுதாசர்கள் எனப்படும் பிரபன்னர்கள். நீங்கள் வர்ணதர்மிகள்; நாங்களோ தொண்டு என்பதையே கைக்கொண்ட தாசவிருத்திகள்; ஒரு நாளும் நமக்குள் தொடர்பு இல்லை’ என்றாராம். இதன் சுலோகம் -- ‘விஷ்ணுதாஸா வயம் யூயம் ப்ராஹ்மணா வர்ணதர்மிண:, அஸ்மாகம் தாஸவ்ருத்தீனாம் யுஷ்மாகம் நாஸ்தி ஸங்கதி:’ (ஸ்ரீஆசார்ய ஹ்ருதயம், ஸ்ரீமணவாள மாமுனிகள் வியாக்கியானம், சூர்ணை 32). ஸ்ரீவில்லிபுத்தூர் பகவர் என்னும் பெரியவர் திடமாகக் கருதிச் செய்த செய்கையும், அதை நன்கு நினைவில் கொண்டு மூலநூலில் குறிப்பாகச் சொன்னதை நன்கு விரிவுபடுத்தி அந்தச் சுலோகத்தையும் தந்து வியாக்கியானம் செய்திருப்பதையும் வைத்துப் பார்த்தால் வர்ணதர்மம் சநாதனம் என்பதோடு சேராது என்றுதானே தெரிய வருகிறது? 

இல்லையே... ஸ்ரீஆதிசங்கரர், ஸ்ரீராமானுஜர் மற்றும் உள்ள பழம் ஆசாரியர்கள் யாருமே வர்ணதர்மம் மாற்றக் கூடியது என்று எழுதவே இல்லையே. பார்க்கப் போனால் வலியுறுத்தித்தானே எழுதியிருக்கிறார்கள்? 

பாருங்கள். என்னைக் கேட்கிறீர்களே... அவர்கள் அப்படிச் சொல்லியிருக்கிறார்கள். இவர்கள் இப்படி எழுதியிருக்கிறார்கள். சரி. நீங்கள்தாம் ஒரு முடிவு பண்ணுங்களேன். ப்ழைய காலத்தில் எழுதியதையெல்லாம் விடுங்கள். ஸ்ரீஆசார்ய ஹ்ருதயமே சொல்கிறதே. ஸ்ரீமணவாள மாமுனிகளே ஸ்ரீவில்லிபுத்தூர் பகவர் என்பவர் தம் வாழ்க்கையிலேயே எப்படி அன்றாடம் வர்ணதர்மத்திற்கும் தமக்கும் சிறிதும் தொடர்பில்லை; தாம் ஒரு பிரபன்னர் என்ற முடிவோடு வாழ்ந்தார் என்பதைத் தம் உரையில் வெளிப்படையாகச் சந்தேகமே இல்லாமல் எழுதி வைத்திருக்கிறாரே! அதைப் போல் நீங்களும் முடிவாகச் சொல்லி விடுங்களேன். வர்ணதர்மம் வேண்டாம் என்று.... ஏன் தயங்குறீங்க... இதான் சொல்கிறேன் ... குழப்பம் என்று. இந்தக் குழப்பம் எல்லாம் திருக்குறளைக் கற்கும் சாதாரண மனிதர்க்கு இல்லை. இந்த மதம் அந்த மதம் என்று இல்லை. உலகில் எந்தச் சாதாரண மனிதருக்கும் பயன்படும் அறநெறியைத் திருக்குறள் தருகிறதா இல்லையா? சாதாரண இந்து என்ற விதத்தில் எனக்கு எந்தக் குழப்பமும் இல்லை. தெளிவான அறவழியை நான் திருக்குறளில் பெறுகிறேன். ஆசார்ய ஹ்ருதயம் ஆவது வைணவர்கள், பிரபன்னர்களுக்கு மட்டும்தான் பேசுகிறது. ஆனால் திருக்குறள் உலகில் மனிதர் யாவரேயாயினும் அவர்கள் சாதாரண மனிதர்களாய் இருந்தாலே போதும், அவர்களுக்கு வேண்டிய அறக் கருத்துக்களைத் திருக்குறள் தந்துவிடுகிறது. இதில் எதற்காக நான் தேவையில்லாத குழப்பத்தில் சிக்கிக் கொள்ள வேண்டும்? இப்படிச் சொன்னா அப்படிச் சொல்றீங்க, அப்படிச் சொன்னா இப்படிச் சொல்றீங்க, ஆஹா பக்தி என்று சொல்றீங்க. சரி நல்லது என்றால் ஊடால வர்ணதர்மம் வருது. இது ஏன் நடுவில் என்றால் இல்லை இல்லை சநாதனம் என்றும் சொல்றீங்க. வர்ணதர்மம் சநாதனமா? என்றால் இல்லை இல்லை ஆபஸ்தம்பர் சொல்றாரு ஹரதத்தர் சொல்றாரு மனிதர்களால் ஆன ஏற்பாடு. சரி மாறக் கூடியதுதானே என்றால் இல்லை இல்லை கிருஷ்ணர் சொல்லியிருக்காரு பாரு கீதையில் என்கிறீர்கள். சரி கீதையில் சொன்னது மாறாது என்றால் ஸ்ரீஆசார்ய ஹ்ருதயத்தில் ஸ்ரீவில்லிபுத்தூர் பகவர் சொன்னது என்ன? என்றால் .. உங்களுக்கு எப்படியோ.. எனக்குக் குழப்பம். ஆனால் பொய்யாமொழியார், செந்நாப்போதார், திருவள்ளுவரின் திருக்குறள் ஒரே வார்த்தையில் ’தெளிவு’. 

ஸ்ரீரங்கம் மோகனரங்கன் 

***